Starostka z Piosku dostała od Kurzisza strużok z krzice

PIOSEK / Pioszczanie majóm swojóm starostke Věrke Szkanderowóm przełokropnie radzi, wiedzóm, że dlo swoji dziedziny robi jyny to nejlepsze.

Jak u Kurzysza młócili krzice, tak ji główny organizator tej przefajnej a ciekawej imprezy Karol Kurzysz obiecoł, że ji załatwi strużok, coby sie ji lepi w nocy spało, aby była rano wyspano i miała energie na wymyślani ulepszyń w dziedzinie.

A jak to obiecoł Kurzysz, tak to aji zrobił.

– Krzice my młócili cepami tymu, aby sie nie pomiyrwiła, aby została rowno. Wymłócónóm próznóm słóme sie wiónzało porwósłym do łokłocków, kiere sie dowo do strużoków. Krzica je dłógo przez dwa metry i do strużoka sie godzi. Tymu, żech nima taki specjalista na szyci, tak żech popytoł pani Krysie Muchowóm z Mostów kole Jabłónkowa, kiero dlo swoji rodziny taki strużoki szyje, czy by mi nie pumógła. Tymu, że to je strasznie szykowno i ochotno babka, hned sie zgodziła. Miech sie szyje z lnianego płótna. A potym sie nabijo słómóm. Grubość musi mieć aspóń 25 cm, aby sie spało wygodnie. Strużok je dłógi a szyroki podle łóżka, kaj przidzie – powiedzioł nóm Karol Kurzysz z Piosku.

Strużok sie musi czasym porownać i dopełnić.

– Jeżech przełokropnie rada, że w Piosku mómy takich fajnych ludzi, kierym zależy na tym, aby stare rzemiosła nie zanikły. A w swoim wolnym czasie przypóminajóm, jak sie hań downi żiło, jako sie ludzie przeokropnie naharowali na roli, aby mieli aspóń kapke chleba. Na młócyniu żech nimógła chybieć. Ale moc żech to nie brała poważnie, że dlo mie taki strużok uszyjóm. Jednego pieknego dnia cosi klep-klep na dwiyrze. Prawiym – dali! Aż mie ze stołka zwaliło, we dwiyrzach sie pojawił nejpiyrw strużok, potym Kurzysz. Jasne, że żech była przeokropnie rada, ale obawy były, jako sie na tym bedzie spać. Strużok był na chwile zy mnóm w kancnaryji, coby my sie na siebie zwykli. Teraz go móm już we swojim łóżku – połopowiadała nóm starostka Piosku Věrka Szkanderová.

A jako sie ji spało?

– No, jakisi obawy były, tak stary madrac żech se niechała wedle łóżka, jak by to nie było wygodne. Ale byłach mile zaskoczóno, obudziłach sie rano, dziwóm sie na budzik, a tam 8:30. Byłach wyspano, jako już dłógo ni. Robota mi szła sama. Strużok je twardszy, ale to mi nie wadzi. W sypialni mi pieknie wónio po słómie. Stary madrac sie na chwile musi spocznyć na górze – dodała starostka.

Jaki sóm wygody spanio na strużoku?

Je to zdrowe, sóm to same materiały z przirody a w sypialni pieknie wónio po słómie.