Francek spóminoł – zwrot.cz

    Na dole w Karwinej – Żabków tymu powiadali – tam stoła nasza chałupa. Niedaleko kopali szachte, tatulek mieli szkody, szli do grofa, ale grof, że pod nami wynglo nima, aby nie musioł płacić. Tata wlyźli do studnie, a wyniyśli kyns wynglo.

    W piwnicy było też pełno gazów. Na kóniec grof musioł zapłacić, a gazy ścióngli nabok.

    A jo jeszcze pamiyntóm, jak tam kole nas było pełno małych szachet. Tam sie wszyndzi cióngło wyngli na rympole, widziołech to na własne oczy, miołech wtedy dziewiyńć, dziesiyńć roków. To były taki studnie, a fiedrowały na nich baby. Nad nimi była łómano strzecha z desek – malućko, aby yny nie padało. To był rympoł.

    Ale potym ta wieża bywała wyższo – to uż prziszła piyrszo maszyna. Było to słabiutki – robiło to ledwa za sztyry baby – ale krawalu to narobiło za dziesiyńć.

    Było też jeszcze na innych szachtach inaksze fiedrowani – taki geple – dwa woły chodziły do koła, a jedyn synek poganioł. W rynce mioł bicz, a pośmigowoł – a jak uż go nogi bolały, siednół dopostrzodka, a wiós sie na chwile. Joch się też roz toczył, to się mi podobało.

    Ale potym, dyżech uż był starszy, poznołech, co to jest hawiyrnia. O jejku kandy, tak się kiesi fiedrowało, a terazy, takowe burgi, taki maszyny…

    Wednie robili, w nocy ni – to potym nieskorszy były noczni szychty, jak uż ludzie wynglu rozumieli – jak zaczło wyngli silniejszy odchodzić do werków a za granice – jak aż była bana (kolyj) – potym to szło wednie w nocy.

    Na zaczóntku to szło strasznie pómału, dwa kible na jednym rympole, to wiycie, że tego nie było moc. To były takowe drzewianne kible ze zieleźnym uchym. Jak szeł jedyn nawyrch, drugi szeł nadół. Na wyrchu toczyła na każdej strónie rympola jedna baba.

    Jak prziszeł kibel nawyrch, przewróciły go, wyngli wysuły, a zaś toczyły. Na dole czakoł jedyn hawiyrz, a nakłodoł. To był słaby fiedrónk – jo nie wiym – ale za cały dziyń isto ani do sto kiblów nie było. A do jednego wlazło piyńć ziymnioczannych koszy – toby tak mioł jedyn kibel cosi przez metrak wynglo.

    A jak były ty szachty głymboki? Jak to móm powiedzieć. Oto roz dzieucha prziniósła tatulkowi jodło, było prawie połednie. Baby wziyny, dały to do kibla, nagnyły się do szachty, a wołały na tego, co nakłodoł na dole: „Bystróniu, dowejcie teraz pozór, mocie tu obiod!” A za chwile był kibel z obiadym na dole.

    („Zwrot” 2001 nr 8)

    Tagi: , , , ,

      Komentarze



      CZYTAJ RÓWNIEŻ



       

      NAJWAŻNIEJSZE WYDARZENIA NA ZAOLZIU
      W TWOJEJ SKRZYNCE!

       

      DZIĘKUJEMY!

      REKLAMA Reklama

      REKLAMA Reklama
      Ministerstvo Kultury Fundacja Fortissimo

      www.pzko.cz www.kc-cieszyn.pl

      Projekt byl realizován za finanční podpory Úřadu vlády České republiky a Rady vlády pro národnostní menšiny.
      Projekt finansowany ze środków Ministerstwa Spraw Zagranicznych w ramach konkursu pn. Polonia i Polacy za granicą 2023 ogłoszonego przez Kancelarię Prezesa Rady Ministrów.
      Publikacja wyraża jedynie poglądy autora/autorów i nie może być utożsamiana z oficjalnym stanowiskiem Ministerstwa Spraw Zagranicznych oraz Fundacji Pomoc Polakom na Wschodzie im. Jana Olszewskiego